Xəstəliklərə qarşı profilaktik tədbirlər davam etdirilir
Xəstəliklərə qarşı profilaktik tədbirlər davam etdirilir
Azərbaycan böyük kənd təsərrüfatı potensialına, zəngin təbii iqlimə, qədim əkinçilik və heyvandarlıq ənənələrinə malik, regionda önəmli rolu olan ölkələrdən biridir. Bunu nəzərə alaraq faunamızı daim ən yüksək səviyyədə qorumağa və gələcək nəsillərə ötürməyə çalışırıq. Son zamanlar ictimaiyyətdə sahibsiz heyvanların məhv edilməsi ilə bağlı əsassız şəkildə yayılmış məlumatlarla əlaqədar narahatçılığımızı bildirir və xüsusi olaraq qeyd edirik ki, Azərbaycan BMT-nin Bioloji Müxtəliflik haqqında Konvensiyasına qoşulmuş və BMT-nin Ərzaq və Kənd Təsərrüfatı Təşkilatının (FAO) üzvüdür.
Bildiririk ki, heyvanların qorunması və xəstəliklərə qarşı profilaktik tədbirlər mövcud qanunvericilikdə nəzərdə tutulmuş qaydalara uyğun olaraq vaxtında həyata keçirilir.
Belə ki, Kənd Təsərrüfatı Nazirliyi yanında Dövlət Baytarlıq Nəzarəti Xidməti tərəfindən vəhşi təbiətdə quduzluq xəstəliyi ilə mübarizə məqsədi ilə əlli min doza oral üsulla peyvənd aparılması üçün vaksin alınmış, bu məqsədlə Xidmətin əməkdaşları meşə zonası rayonlarına, həmçinin Bakı və Sumqayıt şəhərlərinə ezam edilmiş və “Çevik qruplar” yaradılmışdır. Ölkə üzrə 2014-cü ildə qeydiyyata düşmüş 250 minə yaxın itdə quduzluq xəstəliyinə qarşı peyvəndləmə aparılmışdır. Bakı şəhər İcra Hakimiyyəti Kommunal Təsərrüfat Departamenti Sanitariya və Texniki Təmizlik İdarəsi tərəfindən sahibsiz itlər küçələrdə tutularaq şəhərin ətrafında xüsusi ayrılmış yerlərə aparılır. Bununla bərabər itlərin saxlanması məqsədi ilə Bakı şəhəri ərazisində müasir tələblərə cavab verən özəl sığınacaq yaradılmışdır. Heyvanların mühafizəsi ilə bağlı bir sıra normativ hüquqi sənədlər hazırlanmışdır. Belə ki, Azərbaycan Heyvanların Mühafizəsi ilə bağlı 1997-ci ildə Strasburqda imzalanmış Konvensiyaya qoşulmuş, 2007-ci ildə “Heyvanların Mühafizəsi haqqında” Azərbaycan Respublikası Qanunu qəbul olunmuşdur. Bununla yanaşı Azərbaycan Respublikası Nazirlər Kabinetinin 9 mart 2011-ci il tarixli 38 nömrəli qərarı ilə “Azərbaycan Respublikasının yaşayış məntəqələrində it, pişik və ya digər ev heyvanlarının saxlanması Qaydaları” təsdiq edilmişdir. “Heyvanların Mühafizəsi haqqında” Azərbaycan Respublikası qanununa və “Azərbaycan Respublikasının yaşayış məntəqələrində it, pişik və ya digər ev heyvanlarının saxlanması Qaydaları”na uyğun olaraq, Azərbaycan Respublikasının İnzibati Xətalar Məcəlləsinin 126-cı (“Ev heyvanlarının saxlanması qaydalarının pozulması”) maddəsinə cərimələrin artırılması ilə bağlı əlavə və dəyişikliklər edilmişdir.
Eyni zamanda bildiririk ki, heyvanların, o cümlədən sahibsiz itlərin xəstəliklərinə qarşı profilaktik tədbirlər Kənd Təsərrüfatı Nazirliyi yanında Dövlət Baytarlıq Nəzarəti Xidmətinin ciddi nəzarəti altında. Tədbirlər Beynəlxalq Epizootik Büronun standartlarına uyğun həyata keçirilir, biomüxtəliflik və kənd təsərrüfatı mühiti əsaslı və davamlı şəkildə mühafizə olunur.
Sahibsiz heyvanların mühafizəsi qanunvericilikdə nəzərdə tutulmuş qaydalara uyğun həyata keçirilir və gələcəkdə də bu işlərin davam etdirilməsi nazirliyin nəzarətindədir.www.vet.gov.az
