Balıq ovu həvəskarları bunları bilməlidir
Balıq ovu həvəskarları bunları bilməlidir
“Peşəkar balıq ovu ilə məşğul olmaq istəyən şəxslər Nazirlər Kabinetinin 152 nömrəli qərarında müəyyənləşdirilmiş şərtlərə əməl etməlidirlər”
“Balıq ovu 4 yer bölünür. Bunlar sənaye, həvəskar, elmi tədqiqat və balıq artırma üçün həyata keçirilən balıq ovlarıdır. Bunların son ikisinin vətəndaşlara hər hansı bir formada aidiyyəti yoxdur. Ölkədə balıq ovu Nazirlər Kabinetinin 152 nömrəli qərarı ilə təsdiqlənir.”
Bu sözləri Ekologiya və Təbii Sərvətlər nazirliyinin şöbə müdiri Qəhrəman Zahidli balıq ovunun qayda-qanunları ilə bağlı açıqlama verərkən qeyd edib.
Müsahibin sözlərinə görə sənaye balıq ovu ödənişli formada həyata keçirilir: “Həvəskar balıq ovu ilə məşğul olmaq istəyən şəxs, əgər hər hansı bir balıqçılıq cəmiyyətinin yaratdığı mədəni balıqçılıq təsərrüfatında ovla məşğuldursa, onda həmin şəxs də ödəniş etməlidir. Həmin ödənişin məbləği isə üzv olduğu cəmiyyətin rəhbərliyi tərəfindən müəyyənləşdirilir. Peşəkar balıq ovu ilə məşğul olmaq istəyən şəxslər Nazirlər Kabinetinin 152 nömrəli qərarında müəyyənləşdirilmiş şərtlərinə əməl etməlidirlər. Həmin qərarda göstərilir ki, qoruqlar, balıq artırma vətəgələri, istisna olmaqla qanunvericilik çərçivəsində digər yerlərdə həvəskar balıq ovundan istifadə edilə bilər.”
Nazirlik rəsmisi onu da bildirdi ki, həvəskar balıq ovu ilə məşğul olmaq istəyən şəxsin istifadə edəcəyi qarmaqlarının sayı 3 ədəddən çox olmamalıdır: “Əgər balıq ovçusu bir neçə ov alətindən istifadə edirsə, onda qarmaqların sayı 7-dən artıq olmamalıdır. Eyni halda gün ərzində 5 kiloqrama qədər balıq tutmağa icazə verilir. Digər tərəfdən Qırmızı Kitaba düşən və vətəgə ölçüsünə çatmamış balıqların ovlanması qadağandır. ”
Xüsusi su tutumlarında və anbarlarında balıq ovunun xüsusi müddətləri olduğunu söyləyən Qəhrəman Zahidli, “misal üçün Mingəçevir şəhər su körpüsündən, Varvara su anbarının sahillərinə kimi 10 km-lik ərazidə aprelin 1-dən 12-ə qədər, balıq ovu etmək qadağandır. Kür çayı ilə əlaqəsi olan su hövzələrində və Xəzərə axan çaylarda mayın 1-dən iyunun 30-a qədər həvəskar balıq ovu ilə məşğul olmaq qadağandır”, - deyə qeyd etdi.
faktxeber.com
